بین البیادر

یا مطر غیمة صبح فاتح لعد غیثک شلیلي

سگّطت گطرة نده او بس ما روت حرگة غلیلي

ذکّرتني ابجرح نایم جرح ناسیه الدلیلي

هزني شوگ الخیل هم تسمع صهیلي

لا صهیل الفاد واثر لا سحاب الشوگ مطّر

بس خرز عمري ابحلاته انگطع و ابّابک تطشر

کفکفت دمعات عیني العوسجاتک کتّه کتّه

وآنه طیر ابسیف عینک ینذبح وایموت سکته

غسلن حبّک دموعي المات و ابگلبي دفنته

عود بلچي ایشب غصن حبّک قصیده ابري شتلته

لا شذه الریحان عطّر لا عشگنه المات خضّر

طاح کل ورگ المحبه او صار للعشاگ دفتر

گبل بالسنبل لگیتک ذهب مصیوغ اعلی حبّه

ذبّتک ما بین حبّات السنابل غیر ذبّه

آخ من یوصل حصادک بآخر ایام المحبه

چان ادورک بیدي مابین البیادر حبّه حبّه

خوفي لا لعصفور نگّر خوفي من الریح نعثر

خوفي لا لحاصود لمّک خوفي لا ینساک بالبر